Tóti

Styrkir til stjórnmálamanna

Fyrst allir eru að uppljóstra um styrki til stjórnmálamanna, þá er mér bæði ljúft og skylt að játa líka.

Ég og fyrirtæki okkar hafa styrkt stjórnmálaflokka og menn í prófkjörum og kosningum með vinnu og fyrirhöfn í tengslum við vefi og skeytasendingar.

Styrkina hafa þegið:

Framsókn

Björn Ingi Hrafnsson sem fékk sérsniðinn bloggvef fyrir síðustu borgarstjórnarkosningar. Við Bingi erum kunningjar og við leiddumst út í þetta fyrir orð Denna vinar okkar beggja.

Vinstri grænir

Álfheiður Ingadóttir, sem fékk sérsniðinn bloggvef fyrir síðustu þingkosningar. Hún vildi borga fyrir þjónustuna, en þar sem hún er systir Inga Ragnars vinar míns var það ekki tekið í mál.

Björn Valur Gíslason, sem bloggar enn hjá okkur. Hann er einn ötulasti sjóbloggari landsins og bloggar gjarnan í gegn um sjópóst. Mér vitanlega erum við með eina kerfið sem styður sjómannablogg af því tagi skikkanlega.

Sjálfstæðisflokkur

Birgir Ármannsson, sem fékk vefhýsingu hjá okkur fyrir síðustu þingkosningar. Birgi hef ég þekkt frá því hann var mest miðaldra 15 ára piltur sem ég hef hitt, en við kynntumst þegar hann hóf nám við MR.

Kjartan Magnússon, sem fékk sömuleiðis vefhýsingu hjá okkur fyrir síðustu borgarstjórnarkosningar. Kjartan fékk þénustuna gratís fyrir það eitt að vera bróðir Andrésar Magnússonar, stórvinar míns.

Samfylking

Össur Skarphéðinsson, sem var fyrsti pólitíski bloggarinn hjá okkur. Við sannfærðum hann í aðdraganda formannskosninga í Samfylkingunni að blogg væri málið - og sitjum uppi með hann enn. Þess má til gamans geta að Össur sendir alla sína pistla inn með tölvupósti, við höfum ástæðu til að ætla að hann viti ekki einu sinni hvar vefumsjónarkerfið er staðsett. Hann fær þetta allt frítt af því að hann skrifar skemmtilega.

Helgi Hjörvar fékk vefhýsingu hjá okkur fyrir síðustu þingkosningar og hélt áfram fram að þessu prófkjöri, þegar við höfðum ekki tíma til að sinna honum. Hann fékk þetta frítt, að því að við höldum af því að hann var í MH.

Kristrún Heimisdóttir fékk vefhýsingu og vinnu hjá okkur fyrir síðustu þingkosningar. Hún lofaði að greiða fyrir með því að verða landi og þjóð að gagni næði hún kjöri.

Oddný Sturludóttir fékk vefhýsingu og vinnu frá okkur.

Róbert Marshall er með vefhýsingu hjá okkur. Við fengum Sushi í staðinn. Að vísu þurftum við að búa það til sjálf, en samt.

Samfylkingin í Hafnarfirði fékk hjá okkur aðgang að skeytagátt fyrir síðustu þingkosningar. Þeir fengu skeytasendingarnar frítt (aðallega af því að þeir borguðu ekki reikninginn).

Samfylkingin á Akureyri var með bloggvef hjá okkur.

Ýmsir aðrir stjórnmálamenn hafa þegið ráðgjöf og/eða bloggumsýslu í gegn um tíðina.

Við giskum á það að litla sprotafyrirtækið okkar - og við sjálf - höfum með þessu farið talsvert umfram leyfilegan hámarksstyrk til stjórnmálaflokka og einstaklinga (samanlagt) samkvæmt nýju lögunum. Það er kannski rétt að velta því fyrir sér hvort það sé eðlilegt að það sé þannig.

Skráð af Tóti
Tue, 21 Apr 2009 19:47

Athugasemdir

Þú verður að skrá þig inn til að skilja eftir skilaboð

Click here to comment without signing in

Name:

Website:

Comment:

Enter the code: